Waqt xogholijiet li l-Korporazzjoni għas-Servizzi tal-Ilma qed twettaq fin-naħa t’isfel ta’ Malta viċin iż-Żejtun, instab qabar Puniku li jmur lura aktar minn elfejn sena.
Il-qabar li kien għadu ssiġilat, ġie miftuħ u fih instabu numru ta’ urni bi fdalijiet ta’ għadam uman ikremat ġo fihom. Mill-għadam li nstab s’issa jidher li hanwhekk kienet indifnet persuna adulta kif ukoll tifel jew tifla żgħira fl-eta. Instabu wkoll anfora, żewġ urni, lampa taż-żejt, flixkun tal-fwieħa tal-ħġieġ u reċipjenti oħra tal-fuħħar tipiċi tal-perjodu Puniku.
Fi żmien il-perjodu puniku u dak ruman ir-rit kien jinbidel. L-iġsma ġieli kienu jiġu kremati u drabi oħra jindifnu sħaħ tul il-qabar. Il-kremazzjoni kienet titlob diversi riżorsi bħal injam biex jinħaraq il-ġisem u bżonn ta’ persuna li toqgħod mal-post minħabba li l-proċess biex jinħaraq il-ġisem kien jieħu diversi siegħat.
Bħalissa, l-materjal qed jinħareg mill-qabar u jittieħed fil-laboratorju fejn isir proċess ta’ konsolidazzjoni, tindif u analiżi fuq il-fuħħar u l-għadam li nstab.
Il-Korporazzjoni għas-servizzi tal-Ilma qed twettaq xogħolijiet fin-naha t’isfel ta’ Malta biex tkabbar in-network tad-drenaġġ f’żoni li preżentmenet qed jagħmlu użu minn fosos.
Minħabba s-sensittivita arkeologika taż-żona konċernata, is-Sovratendenza talbet li jkun hemm arkeologu mat-tim li qed iwettaq ix-xogħolijiet f’każ li jinstabu xi fdalijiet antiki.
Il-Korporazzjoni fasslet pjan alternattiv biex jitkompla x-xogħol filwaqt li jiġi preservat il-qabar. Dan it-tibdil fil-rotta jaf itawwal il-pjan oriġinali tat-twettieq tax-xogħlijiet.
